პროკურატურამ ცხოველების მიმართ სასტიკი მოპყრობის ფაქტზე პირს ბრალი წარუდგინა
პროკურატურამ ცხოველების მიმართ სასტიკი მოპყრობის ფაქტზე პირს ბრალი წაუყენა, - ამის შესახებ უწყება განცხადებას ავრცელებს.
„რუსთავის რაიონულმა პროკურატურამ ცხოველის მიმართ სასტიკი მოპყრობის ორ ფაქტზე რ. მ.-ს წარუდგინა ბრალდება საქართველოს სისხლის სამართლის კოდექსის 259-ე მუხლის პირველი ნაწილით.
გამოძიებით დადგინდა, რომ 2017 წლის 25 და 27 ივნისს, რ. მ.-მ ქალაქ რუსთავში, გ.თ.-ს კუთვნილი საცხოვრებელი ბინის წინ არსებულ შემოღობილ ტერიტორიაზე, ამ უკანასკნელის ცხოველები - ლეკვები პნევმატური იარაღით დაჭრა, რასაც ერთი ცხოველის სიკვდილი მოჰყვა.
პროკურატურამ უკვე მიმართა სასამართლოს და რ.მ.-სთვის აღკვეთის ღონისძიების სახით 3000 ლარის ოდენობით გირაოს შეფარდებას მოითხოვს.
საქმეზე გრძელდება გამოძიება საქართველოს სისხლის სამართლის კოდექსის 259-ე მუხლის პირველი ნაწილით, რაც სასჯელის სახით ითვალისწინებს მხოლოდ ჯარიმას, ან გამასწორებელ სამუშაოს ვადით ერთ წლამდე", – ნათქვამია განცხადებაში.